Sabías que…na túa actuación profesional pódeste atopar ante SITUACIÓNS DE RISCO que son aquelas nas que pode verse afectada a integridade física e/ou psicolóxica dunha persoa.

Sabías que…?

Atoparse na práctica ante unha situación de risco pode supoñer que teñas que romper a necesaria confianza terapéutica e o principio deontolóxico básico de AUTONOMÍA, os artigos do Código Deontolóxico da Psicoloxía relativos á obriga de respectar a CONFIDENCIALIDADE e a mesma lexislación vixente que garante o dereito dos e das pacientes ao SEGREDO PROFESIONAL.

E que…

As situacións de risco supoñen un dos dilemas fundamentais na práctica profesional e que na súa resolución vas ter que vulnerar principios éticos e lexislación vixente e para iso deberás facer unha axeitada valoración do risco que o xustifique.

Pero que…

Non sempre resulta fácil valorar o alcance do risco e este debe ser o suficientemente claro, que comprometa a alguén que non pode decidir, protexerse e actuar por si mesmo por idade ou diversidade funcional, que os seus responsables ou titores non exerzan a necesaria protección e/ou que o risco non poida resolverse no mesmo contexto da terapia de forma segura.

…e sempre ten en conta que…

Se o risco supón un posible delito cometido sobre persoa vulnerable por ser menor de idade ou con diversidade funcional intelectual e se valora que esa persoa non se atopa protexida tes o DEBER LEGAL de comunicarllo ás autoridades competentes. Esa comunicación debería ir acompañada dun informe no que se dea conta da valoración de risco realizada.

Se hai posibilidade de reiteración delituosa a comunicación debe ser inmediata.