O 10 de outubro celebrouse na Sede Afundación A Coruña o I Encontro Interprofesional de Recursos Humanos, organizado polo Colexio Oficial de Psicoloxía de Galicia (COPG) en colaboración coa Confederación de Empresarios de Galicia (CEG) e a Asociación de Traballadores Autónomos de Galicia (ATA). O evento reuniu a profesionais de áreas como a psicoloxía, o dereito, as relacións laborais e a enxeñaría para abordar os desafíos do liderado no actual entorno laboral.

Baixo o lema «Liderar e comunicar no entorno actual: O cambio necesario», os asistentes exploraron temas como a xestión da diversidade xeneracional, a comunicación efectiva en equipos e as oportunidades dos espazos de traballo híbridos.

O encontro clausurouse coas intervencións de Carlos Montes Piñeiro, presidente da Sección de Psicoloxía do Traballo e das Organizacións do COPG, e Pablo Fernández López, secretario xeral de Emprego e Relacións Laborais da Xunta de Galicia, finalizando cun viño español que permitiu aos participantes seguir intercambiando ideas e experiencias.