A decana do Colexio Oficial de Psicoloxía de Galicia e coordinadora da Área de Psicoloxía e Igualdade de Xénero do Consejo General de la Psicología (COP), Mª Rosa Álvarez Prada, reuniuse o venres 7 de febreiro coa ministra de Igualdade, Ana Redondo, xunto co presidente do COP, Francisco Santolaya, para trasladarlle a necesidade urxente de garantir a atención psicolóxica tanto na Atención Primaria como nos centros educativos. Álvarez destacou que este apoio é fundamental para atender as vítimas da violencia machista e aos seus fillos e fillas, e debe converterse nunha prioridade da Administración Pública.

No encontro, que tivo lugar na sede do ministerio, Rosa Álvarez defendeu a importancia de reforzar os recursos psicolóxicos como parte esencial na loita contra as violencias machistas. «A prevención e a educación son ferramentas imprescindibles para atallar esta problemática, pero sen unha atención psicolóxica adecuada, moitas vítimas non poderán reconstruír as súa vidas», subliñou.

Xunto a Álvarez, participou na reunión Francisco Santolaya, presidente do COP, quen sinalou que os psicólogos e psicólogas son profesionais con capacidade para ofrecer solucións efectivas fronte á violencia de xénero e as súa consecuencias. A ministra Redondo, pola súa banda, mostrouse receptiva ás propostas expostas e comprometeuse a seguir traballando co COP, ademais de trasladar aos ministerios de Sanidade e Educación aquelas medidas que sexan da súa competencia.

Con esta reunión, Rosa Álvarez pretende afondar na defensa dos dereitos das vítimas de violencia de xénero e avoga por unha resposta institucional que inclúa a educación psicolóxica como ferramenta clave para erradicar esta lacra social.