A decana do COPG, Mª Rosa Álvarez Prada, asisitu o 6 de febreiro á cerimonia de ingreso a Academia de Psicoloxía de España do colexiado e catedrático de Psicoloxía Social da Universidade de Santiago de Compostela José Manuel Sabucedo. Convértese no terceiro colexiado galego en formar parte desta institución, tralo ingreso de Elisardo Becoña en 2024 e de Agustín Dosil en 2015.

José Manuel Sabucedo pronunciou o seu discurso sobre a «Psicoloxía da política», no que abordou a irrupción dos extremismos en contextos democráticos e os seus efectos, a maneira en que os comportamentos grupais poden xerar actitudes antidemocráticas, e como a psicoloxía social pode contribuír a analizar e previr consecuencias indesexadas.

O Catedrático do Departamento de Psicoloxía Social, Básica e Metodoloxía da USC foi elixido por unanimidade como académico e ocupa o asento 43 da Academia. Este nomeamento recoñece non só a súa traxectoria académica, senón también a súa contribución ao desenvolvemento da Psicoloxía como iniciador da Psicoloxía Política en España e promotor desta área en Latinoamérica.

Sabucedo comezou a súa actividade docente no curso 1979-80 na USC. En 1982 presentou a súa tese doutoral, «Ideoloxía e Actitudes». Accedeu a praza de titular en 1986 e a de catedrático en 1993. O seu traballo académico centrouse en dous eixos principais: a psicoloxía política, abordando temas como o autoritarismo, o extremismo político e a acción colectiva; e a psicoloxía ambiental, analizando a relación entre os procesos psicolóxicos e o medio ambiente. É autor de máis de cen artigos e sesenta e catro libros ou capítulos.

Foi o primeiro decano da Facultade de Psicoloxía da USC e impulsor da primeira Conferencia de Decanos de Psicoloxía de España. Tamén foi editor da Revista de Psicoloxía Social e presidente fundador da Sociedade Científica Española de Psicoloxía Social (SCEPS). Ao longo da súa traxectoria, recibiu numerosos galardóns, entre eles o Premio Galicia de Investigación (2006), a Medalla Domingo García-Sabell Rivas da RAGC (2020) e o Premio Ibérico de Psicoloxía (2022).