A maioría dos expedientes que chegan para o seu estudo, proceden de avisos de membros do COPG.
A Comisión agradece a preocupación amosada polxs compañeirxs arredor das ameazas de intrusismo, e salienta que é fundamental contar coa complicidade de todas as persoas colexiadas para promover a visibilidade da profesión.
A Comisión analiza cada asunto que se lle achega e que poidan constituír un caso de intrusismo profesional, e actúa, dentro do marco das súas competencias e capacidades, para tratar de atallalos.
Algúns dos casos que se atopa con máis asiduidade son:
- Persoas que ofrecen «terapias alternativas», con insuficiente ou nula base científica (pseudoterapias), para tratar problemas de índole psicolóxica.
- Persoas que, sen ningunha titulación oficial, ofrecen servizos «terapéuticos”, propios da atención psicolóxica, e que inducen á confusión con publicidade pouco clara ou enganosa.
Teñamos en conta que, como psicologxs, as nosas intervencións sempre deben ter fundamento suficientemente contrastado, dentro dos límites do coñecemento científico vixente (arts. 6 e 18 do Código Deontolóxico).
Lembra que se consideras que se está a cometer intrusismo profesional na psicoloxía, podes comunicalo ao COPG, aportando todos os datos posibles, para iniciar o estudo correspondente. O COPG actúa de oficio para garantir a confidencialidade dos datos da persoa informante.
