Entre o 28 de febreiro e o 1 de marzo, tivo lugar o X Encontro Nacional para Profesionais, Familiares e Ex membros de Seitas na Escola Galega de Administración Pública de Santiago de Compostela, no que participaron máis de 80 persoas. Este encontro buscou promover o coñecemento sobre estas dinámicas abusivas, sensibilizar e crear un lugar de encontro, intercambio e diálogo. A inauguración contou con Dolores Seijo en representación do Colexio Oficial de Psicoloxía de Galicia, xunto con Miguel Perlado, psicólogo clínico e forense, fundador da AIIAP e impulsor dos Encontros Nacionais sobre Seitas, e Íñigo Rubio, psiquiatra e presidente da AIIAP. A continuación, desenvolvéronse as mesas de relatorios, onde se trataron cuestións como as consideracións xurídicas e psicolóxicas acerca dos miguelianos ou as malas prácticas terapéuticas.

Dolores Seijo, presidenta da Sección de Psicoloxía Xurídica, durante a inauguración do Encontro

Esta iniciativa foi levada a cabo pola Asociación Iberoamericana para la Investigación del Abuso Psicológico (AIIAP), co apoio do Colexio Oficial de Psicoloxía de Galicia, EducaSectas e o Grupo de Traballo en Derivas Sectarias do Colexio Oficial de Psicoloxía de Cataluña (COPC).

«A nosa tarefa non é perseguir crenzas ou propostas alternativas: é alertar do dano e advertir sobre o risco das seitas». Miguel Perlado, fundador da AIIAP, centrou esta décima edición na prevención, a avaliación e a análise do discurso das seitas. Para iso, ao longo deses días, reuníronse diferentes profesionais do ámbito da psicoloxía, xunto con outras profesións como a psiquiatría, o xornalismo ou a avogacía, así como persoas directamente afectadas, que reflexionaron tanto sobre as consecuencias de vivir en contextos sectarios como sobre as ferramentas de avaliación do abuso psicolóxico nestes grupos.

Na xornada do sábado 1 de marzo foi a quenda das ponencias, nas que se abordaron os retos na cobertura informativa sobre grupos coercitivos, como axudar as vítimas desde as propias familias, entre outros temas. Estes encontros estiveron abertos tanto a profesionais como á cidadanía en xeral, nunha contorna na que se procurou fomentar o pensamento arredor destas dinámicas abusivas.