O 1 de outubro conmemórase o Día Europeo da Depresión para crear conciencia sobre esta importante cuestión de saúde mental. En Galicia, a depresión estímase que afecta a máis de 129.000 persoas, o que equivale a unha prevalencia aproximada do 5,6% da poboación. O consumo de psicofármacos é especialmente alto na nosa Comunidade: segundo os últimos datos (2022), en Galicia consúmense 146,78 doses diarias de antidepresivos por cada 1.000 habitantes, un 50% máis que a media estatal (98,81) e un 60% máis que hai unha década. Con todo, a pesar do seu impacto significativo na calidade de vida de quen a padece, a accesibilidade á atención psicolóxica aquí segue sendo un desafío, xa que temos unhas das ratios máis baixas de especialistas en psicoloxía clínica na sanidade pública en comparación co resto das autonomías.
Segundo diversos estudos, un 15% das persoas padecerán un trastorno depresivo ao longo da súa vida. Un recordatorio de que debemos enfrontar este desafío xuntos e especialmente, ofrecer recursos desde a Sanidade pública para garantir o seu adecuado tratamento. A boa noticia é que o tratamento profesional é moi eficaz, así que é importante buscar axuda. A Psicoloxía está para coidar da saúde e do benestar das persoas. Ademais, outro xeito de axudar é reducindo o estigma e brindar apoio a quen o necesita.
A depresión é unha enfermidade mental que afecta non só á mente, senón tamén ao corpo e á contorna social de quen a padece. En Galicia, como en calquera outra parte do mundo, as persoas que sofren de depresión enfrontan unha serie de desafíos, como a perda da calidade de vida, dificultades nas relacións interpersoais, e a miúdo, un aumento no risco de problemas físicos e de saúde mental máis graves.
A pesar da gravidade da situación, moitas persoas en Galicia enfróntanse a unha barreira significativa para acceder á atención psicolóxica que necesitan:
- Escaseza de profesionais: Existe unha falta de psicólogos e psicólogas no SERGAS, especialmente en Atención Primaria. Algúns dispositivos están dando cita para a primeira consulta cun ano de espera.
- Estigma social: O estigma que rodea aos problemas de saúde mental a miúdo impide que as persoas busquen axuda a tempo.
Incrementar a accesibilidade á atención psicolóxica en Galicia é esencial por varias razóns:
- Mellora a calidade de vida: A atención psicolóxica pode axudar ás persoas para xestionar os seus síntomas e recuperarse da depresión, mellorando significativamente a súa calidade de vida.
- Prevención do suicidio: A depresión é un factor de risco importante para o suicidio.
- Redución de custos a longo prazo: O investimento en atención psicolóxica temperá pode reducir os custos asociados co tratamento de problemas de saúde mental máis graves no futuro.
En conclusión, a depresión afecta a moitas persoas en Galicia e en todo o mundo. Incrementar a accesibilidade á atención psicolóxica é fundamental para axudar a quen a padece a recuperarse e mellorar a súa calidade de vida. É responsabilidade da sociedade e das autoridades tomar medidas concretas para abordar este problema de saúde mental de maneira efectiva.
